尋日去炒散搬貨,我執咗隻黑貓返屋企


13. 意志

日期:2017-03-22

「嗚呀!」克儉獸一聲慘叫,我擰轉面見到佢被一條金色嘅鎖鍊綁住,而佢身後係金星戰士同水星戰士。

金城有用力拉住鎖鍊嘅一端,勒到克儉獸氣都唞唔到。

我突然眼濕濕:「我都話我冇用架啦,金星戰士一個人就搞得掂,我真係死咗佢好過。」

金城有大叫:「公主,你知唔知點解我哋上一世要犧牲?」

「咪就係我廢柴、我冇用,我冇做好生涯規劃囉!」

「唔係咁架,公主!」阿水大叫。

「係因為你值得我哋咁做!你值得我哋犧牲!其實喺你身體入面,係蘊藏住無人能及嘅强大力量,只係你而家未發揮到。」

「我 ? 我有强大力量?」

金星戰士同水星戰士一齊點頭。

「但係……我……我冇信心。」我擰返轉身望落條街,如果跳落去,就唔使再有煩惱。

「公主,你係被克儉獸嘅生涯規劃打中,所以先胡思亂想,如果你跳咗落去,你嘅强大力量都會奉獻晒畀黑暗帝國,到時所有人都……都……」阿水唔知做乜講唔落去。

「都會再犧牲多次!」金城有話。

「如果我跳咗落去,你哋都會死?」我問。

「冇錯!你千祈唔好被克儉獸迷惑,你要用你嘅意志戰勝佢!」阿水話。

「嗚啊!衣冠禽獸光波!」克儉獸雖然被綁住,但竟然都勉強使出咗一招。

「吒!」鎖鍊被光波射中應聲斷開。

「衣冠禽獸光波!」佢立即再出多次同一招,向住阿水射去。

「皂泡紛飛!」阿水大叫,然後有好多泡泡由佢手上湧出。

「呀!」但唔使兩秒,佢啲泡泡就被光波打散晒!好彩阿水一躍而起,好快彈開咗,先冇被個光波射中。

「月光昇華洗禮!」我趁住克儉獸背向我,向佢射出一道激光。

「我唔會被你迷惑架!想拎我嘅靈魂?咪使旨意!」我大叫。