尋日去炒散搬貨,我執咗隻黑貓返屋企


12. 了結

日期:2017-03-21

「公主,由得個學生妹中招啦!佢暈咗,對佢冇作用架!」我終於聽到露娜講咩,但係我已冇能力改變,因為我重未嚟得切反應,已正面撞上咗本生涯規劃!

「唉呀!」我跌咗喺地下,但望下個身又好似冇穿冇爛,又唔覺得邊度痛,乜原來克儉獸呢一招係咁渣?

我慢慢企返起身,望住克儉獸,克儉獸佢西裝骨骨,唔知點解我突然諗起,我咁大個仔連西裝都冇著過……

咁都係嘅,一個冇學歷嘅車房仔,著起西裝都唔似樣啦,日日牛記笠記污糟到死,收工搭車啲靚女OL寧願企都唔想坐我隔離。

再諗深一層,我而家連車房仔都冇得撈,我都唔知自己生存為乜,又冇老婆仔女,連女朋友都冇,老豆老母去咗賣鹹鴨蛋,其實就算我死咗,對呢個世界都冇影響,連一個會為我傷心嘅人都冇。

我慢慢轉身,爬上咗天台嘅邊緣。

「咁就啱啦!你呢個廢人,生存落去重有咩意思?」克儉獸喺後面鼓勵我。

呢個時候,突然有啲嘢踏住我隻腳,我低頭一望,係露娜。

露娜話:「公主,我畏高,你快啲帶返我落去啦!」

我擰擰下個頭,唔知點解好想喊:「唔使理我呢個廢人,你去投靠金城有同棟你個篤啦。」

「你點會係廢人?地球嘅安危就靠你守護!你係月亮戰士!」

「露娜,喺月亮王國嘅時候,我連累大家為我犧牲,或者今世我了結自己,唔阻手阻腳重好呢?」

「唔係咁架!公主……」露娜重未講完,突然一道黑色嘅衣冠禽獸光波向露娜射過嚟!

「公主,救我!」我想拎新月棒出嚟,但唔知點解唔見咗,回頭先見到原來我頭先一跌連碌棒都跌埋喺地。

「哇!個光波一嘢轟落露娜……原先企嗰個位,而露娜就自己跳開咗。

我鬆咗一口氣,但為自己連救露娜都做唔到而更加嬲,一個咁廢嘅戰士,唔死又有咩用?我向前行咗步,只要我再行嘅話,就可以了結咁無用嘅一生。

突然,我感覺到一道强光喺我身後出現……