尋日去炒散搬貨,我執咗隻黑貓返屋企


11. 生涯規劃

日期:2017-03-20

「嗚嗚嗚……」個學生妹係咁喊,然後又行前咗步。

「公主,你快啲出去救咗個女仔先啦!」露娜話。

「點救?等……等埋金星、水星佢哋嚟先啦!」我認我淆底。

「重等?個學生妹就快跳樓啦!」

「妹妹啊!你再行前一步,所有嘢就可以解決。」隻克儉獸又喺度阿之阿左,但佢冇講錯,個學生妹真係行多一步就會跌落去。

我鼓起勇氣,慢慢爬去近學生妹嘅位置,然後露娜喺本來嘅位置突然撲出,將天台嘅雜物推跌晒!

「邊個?」克儉獸擰轉面望向露娜嘅方向,就係呢個時候,我飛撲出去拉咗個學生妹落嚟,然後用咗少少少少咁多力打暈咗佢。

我咁大動作,克儉獸當然立即發現唔對路,擰返轉過嚟睥實我:「係你?月光公主,原來你都嚟咗地球咩?都好,等我一次過收你皮!」

「咪使旨意!」我拎碌新月棒出嚟大叫:「月光昇華洗禮!」

望住激光從新月棒射向克儉獸,我忍唔住大叫:「一嘢轟埋去!」

前面塵土飛揚,正當我以為隻克儉獸灰飛煙滅之際,竟然見佢喺塵土中行出嚟,而且係面帶勝利笑容,一啲損傷都冇咁。

「你……你……」我咩都講唔出。

「你啲絕技好似重差過以前,你玩完就到我啦!」佢好陰險咁講完,就突然大聲鳩叫:「衣冠禽獸光波!」

一度黑色嘅光波喺佢條領呔上彈出,直向我嗰邊射埋嚟!

好彩我平時炒散執倉執得多,喺迷你裙下充滿住肌肉嘅一雙腿極具爆發力咁一撐,我成個人彈到好高,避開咗舊衣冠禽獸光波。

「哈!你個絕技嘅名都好襯你,可惜射唔中我!」呢一刻我真係有少少囂張。

點知隻克儉獸大叫:「嘿!傻仔!睇住嚟啦!生涯規劃!」佢手上突然有本好大嘅好似proposal咁嘅物體飛去瞓喺地下嘅學生妹度,原來佢早預料到我會避開佢第一招,於是就可以攻擊我身後嘅學生妹!

我舉起新月棒指住個天,大叫:「月光昇華洗禮!」

同一時間,露娜大叫:「唔好中計!學生妹之前已中過生涯規劃呢一招架啦,佢而家暈咗所以……」

我聽唔到露娜後面嗰句講咩,我只知因為我故意向上射出「月光昇華洗禮」,而家由於反作用力嘅關係,我將會高速向下撞向本生涯規劃。