篤姐短打


1. 一班朋友入面,總有一、兩個你睇佢唔順眼,但又唔會絕交。

日期:2017-04-07

「Dan遲到呀?」我入到餐廳只係見到得阿强同健仔。

「唔係遲到,係唔嚟,佢WhatsApp 嚟話要陪女友喎。」阿强話。

我:「吓?今次食飯成個月前約好,佢陪少條女一日唔得嘅咩?」

健仔:「真係頂佢唔順,自從佢同而家條女一齊之後,十次有九次都甩我哋底。」

我:「人哋條女改個名都叫Princess,擺明係有公主病啦,冇觸犯商品說明條例喎。不過咁,下次叫埋佢條女出嚟又得唔得呢?」

阿强:「嘩,你真係玩命!上次你臨時出trip冇嚟,本身咪約咗佢條女,點撚知出到嚟,條女黑口黑面,話點解去茶餐廳食,唔係去cafe喎?」

健仔:「係啦!嗰次真係想打佢條女一鑊。」

我:「咁正?咁阿Dan點?」

阿强:「條友唔撚係男人嚟架!坐咗半個鐘話同條女走先,話佢食唔到茶餐廳啲嘢,再坐會餓親喎!」

我:「嘩,咁都得?」

健仔:「最正係佢之後打畀我,同我講下次如果要約埋佢條女就要去cafe喎!」

阿强:「佢都戇鳩嘅,見過鬼重唔怕黑?以後食飯就係特登約茶餐廳,隻Princess咪嚟就最好。」

我:「弊在隻Princess唔嚟,阿Dan都唔嚟呢!」

健仔:「我哋四個由中學識到而家,一直都好地地,真係估唔到阿Dan一拍拖就變晒,唔只聽晒隻Princess話,重成日條女買乜買物時幫佢埋單。」

我:「呢個我知呀!有次我忍唔住勸下佢,點知佢話Princess係佢真愛,就算傾家盪產都在所不辭喎。」

阿强:「講真,真係有少少睇唔起佢,唔鬼想同佢做friend.」

「老友咪放棄,放都o徙氣baby,振振兩臂,拍拍背肌打氣……」阿强個電話響起。

「哇!夜晚唔好講人,阿Dan打嚟。」阿强將電話開咗免提:「Dan哥,點呀?有咩貴幹?」

Dan:「强,你係唔係有馬拉童折扣號?我女朋友睇中咗對波鞋呀!」

阿强:「屌你!叫你食飯你又甩我,而家重好意思問我拎折扣?」

Dan:「唏,唔好咁啦,下次必到!」

阿强:「你條粉腸,你畀錢嗰時講我手提電話就得。」

Dan:「唔該晒!果然係好兄弟。」

收咗線之後,我忍唔住串阿强:「又話唔想同佢做friend?」

阿强:「咁唔係點唧?屌你!」

健仔:「老老實實,咁下次食飯重叫唔叫Dan?」

阿强:「叫囉!佢唔嚟就罷!識咗咁耐唔通唔叫佢咩?」

冇錯,阿强一句「識咗咁耐」幾乎可以解釋咗點解好多時明明睇某個人唔順眼,但又唔會絕交;問題係,呢種關係,重算唔算係朋友呢?