尋日去炒散搬貨,我執咗隻黑貓返屋企


10. 收集靈魂

日期:2017-03-16

「露娜,你睇下對面樓!」

「我唔會中計再跳上咁高架!」

「唔係呀!」我一手抱起佢迫佢望出窗外:「對面天台係唔係有個人想跳樓?」

「唔?真係喎!」露娜話。

「唔係又係啲學生跳樓啩?咪啦!我都係報警!」我擺返低露娜落地,轉身去拎電話。

當我要按第三個9字時,露娜叫住我:「唔使報警!」

「吓?你想睇人跳樓呀?人冇九條命架!」

「唔係,我頭先見到個人影後面有啲嘢,而且……我感覺到有妖氣!」

「妖氣?」

「係!我好肯定係!公主殿下,出動啦!」

「吓?好,但我打畀金城有同阿水先!」

雖然上次喺酒樓成功打低玉娥獸隻小妖,但一個人對抗真心淆底,所以點都要拖馬幫手,而且隻金城有成日巴巴閉咁,咪睇下佢作戰時有幾勁揪囉!

打完畀佢哋,我就去返個窗到望,點知露娜大聲喝我:「重望?過去啦!」

「金城有同阿水都未嚟!」

「你行咗先啦!」佢伸咗啲貓爪出嚟恐嚇我。

「唉……好嘅,包大人。」

我不情不願咁去到對面大廈,個看更瞓緊,所以我同露娜好容易就自己搭咗電梯上頂樓。

「咦?上天台度門冇鎖喎!」我話。

露娜細細聲講:「咪住呀?我感覺到上面有好强烈嘅妖氣!你快啲變咗身先啦。」

「哦。」我伸直手大叫:「變身!」變身嘅過程,我都唔想再形容,總之就係戇鳩鳩咁。

「好啦!上去啦!」露娜細聲講。

我哋輕手輕腳推開上天台度門,再沿樓梯向上行。

露娜探頭望向天台範圍,再回頭示意我跟佢行。

一行到出去,我就見到左面有兩個人影背向我哋,一個係企高咗喺天台邊緣,應該就係我頭先喺對面望到想跳樓嘅人,佢著住連身校裙,似乎係個女學生;另一個就係企喺佢後面,著住西裝嘅男人。

我同露娜快步匿埋咗去水箱後面,先觀察眼前嘅狀況。

「嗚嗚嗚……」個女學生係咁喊。

「跳落去咪一了百了囉,你書又讀得唔叻,屋企人又唔錫你,不如將個靈魂送畀我哋黑暗帝國啦!」條西裝友話。

「哇!叫人自殺咁仆街嘅?」我話:「喂,等等先,咩黑暗帝國?」

「黑暗帝國就係當日毀滅月亮王國嘅力量,玉娥獸都係黑暗帝國嘅!睇嚟佢哋下個目標係地球……」露娜話。

「妹妹啊!你生涯規劃冇做好,而家唯一出路就係去死!」條西裝友繼續刺激個女學生。

我聽到露娜倒抽咗一口涼氣:「生涯規劃?我記得呢個用詞啦!呢個西裝友係……係……係黑暗帝國最强魔獸之一──克儉獸!」