尋日去炒散搬貨,我執咗隻黑貓返屋企


9. 懦弱

日期:2017-03-15

「唉,公主你真係一啲都冇變。」金城有嘆住氣講。

「即係點呀?」我問。

「是咁的,我地喺呢一世同前世嘅性格都好似,好似我就鍾意讀書,金星戰士就貪靚……」阿水解釋。

「咁我上一世係點架?」我問。

「你?」阿水面有難色。

「你咪同今世一樣懵下懵下咁囉!」金城有話。

「屌!你生得靚仔大晒咩?成日用鄙視眼神望我!」我忍唔住睥咗佢一眼。

「遲啲我哋揾到火星戰士,佢見到你投完胎都咁嘅款,都會忍唔住鄙視你!」金城有話。

呢個時候,阿水成個智者咁轉移話題:「火星戰士上一世係打理廟宇嘅,佢今世會唔會都係一樣?而木星戰士就力大無窮,唔通會係舉重選手?」

「喂,正啊,如果係舉重選手,有咩事推佢出去都頂到一陣!」我話。

金城有反咗下白眼,冇理我講乜,而係話:「好啦,而家都夜,我哋交換聯絡方法,等我同阿水諗一諗,先再去揾火星、木星戰士啦。」

「你靚仔,你點話點好啦!」我話。

如是者我哋各自返咗屋企,又過咗幾日,金城有同阿水真係冇揾過我商量。

「其實隻金星完全冇放我喺眼內……」我忍唔住向露娜發嚕囌。

「金星戰士作戰經驗比你豐富,佢只係想公主你快啲成長,只要你更堅强,更有能力,佢就唔會咁架啦……」

「成長成長……我都人到中年,重成長唔夠?唔好話佢想搶我月光公主個位?」

「刮」!露娜突然跳起用貓抓好大力咁抓咗我一下,然後好嬲咁話:「佢哋每一個戰士,上世都係為救你而死架!」

我呆咗,一句嘢都講唔出。

露娜繼續講:「就係因為你太懦弱,又唔夠聰明,所以大家先要守護你,所以大家先會死,月亮王國先會毀滅!」

「喂!做咩瀨鳩晒我一個人唧?我……我想架?」

露娜好嬲咁話:「你冇得救啦!我都係去金星戰士嗰度!」佢跳咗去窗邊。

「你咪一樣咁蠢!你唔記得咗自己畏高?你望下,呢度成19樓架!」

「喵!」露娜驚叫住跳返入屋內。

「咦?」就喺呢個時間,我見到對面大廈天台有個人影企喺邊緣位置,好似想跳樓咁……