尋日去炒散搬貨,我執咗隻黑貓返屋企


8. 覺醒

日期:2017-03-14

喺叫醒阿水之前,我先變返身做平凡人,以免佢醒咗又嚇親。

「喂,醒下啦!」金城有好大力咁拍阿水塊面。

「嗯……喪屍呀!人妖呀!」阿水邊驚叫邊擘大眼。

「咦?」阿水疑惑咁望住眼前嘅金城有。

「阿水,你終於醒啦!」我大叫:「你冇睇錯呀!呢個係金城有,拍戲嗰個呀!」

「點……點解……」阿水慢慢坐起身:「頭先有隻喪屍想捉我,跟住我就暈咗,然後……啊!」

佢突然好快咁企起身大聲講:「啊!金城有,你哋拍喪屍戲呀?」

金城有無奈咁反咗下眼,我行上前拍拍阿水膊頭:「阿水,我畀啲嘢你睇,你唔好驚。」

佢一臉疑惑咁望住我,我身後嘅露娜慢慢行出嚟,抬高頭望住阿水話:「水星戰士!」

「隻貓識講嘢嘅?」阿水嚇到眼都凸,與此同時,露娜頭上嘅月光射出一條光柱直達阿水個額頭,然後阿水全身嘅衫就突然冇晒!

接落嚟相信大家都估到,阿水頭搖又尾擺進入脫毛境界,半空一字馬過後,佢換上咗全藍色嘅水手服短裙……

「咩事呀?呢一身打扮……咁似我頭先見到嘅人妖嘅?」阿水驚叫。

「你係水星戰士,醒覺啦!」金城有一路講一路舉起自己手大叫:「金星戰士,變身!」

當然,佢嘅變身過程同我一樣,係又拗腰又拉筋,好快佢就換咗橙色裙嘅水手服。

「你……我好似記得啦!」阿水疑惑地望望金城有,又望望我,然後把聲都震晒咁話:「公主殿下,我認得你啦!」

「果然係高智商嘅水星戰士,覺醒得特別快。」金城有望下我,再講:「但公主似乎重係一舊雲,唔記得自己嘅使命,真係令我擔心。」

「我?我知!守衛地球吖嘛!」我唔忿氣咁講。

「嗯,你重記唔記得地球王子,如果你連佢都唔記得,即係你未完全覺醒。」金城有望住遠方話。

「咩撚地球王子呀?」我問。

「金星戰士,公主唔記得,都未必係壞事嚟嘅,可以專心啲揾剩返嘅木星同火星戰士。」阿水又望向遠方話。

「都係嘅。」 金星戰士轉身望住阿水:「我發現戰士今世雖然變咗男人,但性格或多或少同上世相似。」

阿水好似好明白咁話:「你講得啱!我哋就依呢個方向去揾。」

「喂喂。」我篤咗篤阿水膊頭:「其實你哋講緊乜春?依乜方向?可唔可以尊重下公主我,唔好剩係講你哋明嘅嘢?」