尋日去炒散搬貨,我執咗隻黑貓返屋企


7. 金星戰士

日期:2017-03-13

阿水迷迷糊糊咁合埋眼喺度驚叫:「喪屍呀!喪屍呀!」佢頭先一定係畀玉娥獸嚇到好驚。

於是,我更大聲咁叫佢:「阿水!阿水!」

阿水突然擘大咗眼,定一定神望住我,我話:「冇事啦,阿水!」

佢面容忽然扭曲到好似《吶喊》嗰幅油畫咁,再驚叫咗句:「人妖呀!」只見佢眼珠向上翻,然後又成個人癱軟暈咗。

「喂!我唔係人妖呀!」我大叫。

「公主殿下,不……不如你變返身做平凡人個樣先啦。」露娜話。

「妖,呢身造型真係……」說話未講完,突然有幾聲腳步聲向後樓梯靠近。

「唔通玉娥獸返咗嚟?」聽見腳步聲,我當堂驚一驚。

「唔係。」露娜伸直個身望向腳步聲嘅方向:「金星戰士?」

一個高挑嘅身影攝咗入後樓梯,我定眼望清楚,竟然係國際影視明星金城有!

「格格格……」我個喉嚨發出怪聲,然後好唔容易講咗句:「金城有!你係金星戰士?」

佢點咗下頭,然後我忍唔住話:「你……真人靚仔過上鏡呀!」

呢個時候,我留意到佢手上抱住隻白貓,隻貓同露娜一樣,額頭有個月亮。

金城有好激動咁話:「棟你個篤,全靠你感應到,我哋終於揾到公主啦!」

「冇錯。」白貓開口答。

「唔好意思,借問聲咩係『棟你個篤』,係咒語?定係……?」我未講完,白貓就話:「係我個名,我叫棟你個篤。」

「棟你個篤!」露娜好開心咁叫,而棟你個篤亦從金城有手上跳咗落地,再跑去露娜旁邊。

我彎低身望住佢兩隻嘢:「喂,你個名咁怪,不如改過個啦?叫旺財好唔好啲?」

棟你個篤望望我,好串咁話:「我又唔係你隻貓,做咩要聽你講?」

「哎呀!我係公主,唔係大晒嘅咩?」

「咳咳,唔好意思,棟你個篤係我喺金星帶過去月亮嘅,我除咗係金星戰士,亦係金星公主,棟你個篤係從屬於我嘅。」

「Ok ok!我講下笑啫,唔好緊張。」

「公主殿下,我只係希望你會更加專注喺守衛地球呢件事。」

「咁……咁……不如我哋而家叫醒條友先啦,佢係水星戰士!」我指一指攤喺地下嘅阿水。