尋日去炒散搬貨,我執咗隻黑貓返屋企


6. 第一次戰鬥

日期:2017-03-10

我隻腳又舉咗上頭頂,手上拎住嘅新月棒無啦啦彈咗兩條絲帶出嚟,我差啲以為自己去咗參加奥運體操項目。

幾經辛苦,終於變完身,舉個V字去額頭擺靚個姿勢,把口唔受控咁講咗句:「我係愛與正義嘅化身,你竟然敢作惡?我而家就收拾你!」

「仆街啦!點解我講咗啲咁柒嘅嘢?」講完口號,我終於控制得返自己把口。

「嘿嘿嘿嘿!月亮戰士,睇路呀!」玉娥獸突然漲起個肚大叫:「玉娥小妖!」跟住佢擘大口無啦啦喺度嘔。

我呆咗,我真係呆咗,身為愛與正義嘅化身,見到人嘔係唔係應去揾粒止嘔藥?

不過好快我就打消咗個念頭,因為佢嘔出嚟嗰堆野竟然變咗隻好似一團爛肉咁嘅小妖。

「小妖,打鳩佢!」玉娥發施號令,隻黏糊糊嘅小妖立即撲埋嚟。

佢用隻爛手打鳩我。

然後,我飛咗埋牆,痛到仆街。

「公主,快啲出月光昇華洗禮啦!」

「哦」!我暈陀陀咁聽到露娜把聲,於是唔理三七廿一,舉起枝新月棒大叫:「月光昇華洗禮!」

一道猛烈嘅激光射向小妖,「轟」!佢個身穿咗個大窿然後瞓低咗,唔止咁,後面幅牆都穿咗窿,我見到外面嘅阿强O晒嘴咁望咗我一眼,然後大叫:「走呀!大家快啲走呀!有人妖帶炸彈嚟打劫呀!

只見佢同酒樓入面嘅所有人都喺兩秒內走晒,而小妖又死埋……

我擰轉面望下玉娥獸,佢慢慢咁淡化緊,個樣就好唔忿氣咁:「嘿!下次我再派第二啲小妖打你,你睇住嚟啦!」

「咪走呀!水星戰士喺邊?」露娜大叫,但玉娥獸已消失咗。

「哇!隻小妖一嘢就輸咗,真係打機都冇咁易!」可能男性天生嘅好戰基因發作,呢刻我真係好興奮。

「玉娥獸派出嘅呢隻小妖,係最低級架,公主殿下,你千祈唔好輕敵。」露娜一臉認真咁講。

「知道啦!咁而家唔見咗水星戰士點算?」

「周圍揾下啦,我諗玉娥獸收埋佢喺附近嘅啫!」

我望下酒樓入面,幾乎都被我一招移平,  我靈機一觸: 「我知阿水喺邊啦!」

露娜跟住我一枝箭跑去後樓梯,果然,阿水被縛手縛腳暈咗喺地下。

「阿水!阿水!」我係咁拍佢塊面。