【都市故】彩虹站多出來的路軌


8. 等待

日期:2016-09-08

「唔見佢喎!而家都成12點幾,會唔會返咗屋企?不如你去佢屋企揾佢啦!」時叔道。

「咁……去彩虹村吖唔該。」

「唔怪得你嗰晚會喺彩虹啦,OK!而家即去!」

的士旋即在街飛馳,不消5分鐘便已到了彩虹村,但我卻沒有下車。

「喂!重唔落車?瞓咗呀?」時叔側過頭來道。

「唔係呀,我……」我吞吐著。

「乜料?」

「我只知佢住彩虹村,但邊座幾樓幾室我就唔知……」

「屌!你係唔係路?女朋友住邊都唔撚知?」他突然爆怒起來。

「拍……拍咗唔係好耐拖咋!」

「唉,你啲後生仔,咁點呀而家?」

「我send SMS畀佢啦!」

「重SMS,你咩年代嘅生物嚟架?」

「唉……唔係我,係我女友……」我邊說邊發了個SMS給Coco:「我喺你樓下,你落嚟啦!旋即又致電給她,可是她始終沒有回覆SMS,也沒有接電話。」

「唉……」我嘆了口氣。

「象仔,咁又唔好咁灰,可能佢沖緊涼未得閒覆你,時叔陪你等一陣。」

「估唔到你呢個的士佬又幾好人。」我苦笑了一下。

「我呢啲講義氣架嘛!唔好話我唔教精你,追女仔要耐性,想當年我同我而家個老婆,都經歷咗好多先喺埋一齊。」他頓了一頓又道:「當年我呆下呆下咁,份人又唔浪漫,就同你而家咁上下;我老婆當年靚就唔係話好靚,但有性格囉,我哋都成日嘈交架,嘈下分下又合下,最終結埋婚囉!嗰時我哋……」

時叔沉醉地想當年,我卻沒心思聽下去,雙眼凝望著手機屏幕,可是過了一小時,也得不到我想要的回音。

「喂!有冇聽時叔講嘢架?」我突然回過神來,聽到時叔這樣問我;其實他倒真厲害,能一小時喋喋不休地說話。

「頂你個肺,同你分享媾女秘技你就發夢,我見你同我有緣先同你講架咋!」

「唉,算啦!」我沒心情回應他,垂頭喪氣地道:「都揾唔到Coco,你車我返荃灣綠楊新村吖,計返車錢。」

「OK!你點話點好囉!」時叔邊回應邊準備開車。

我看著窗外掠過的街景,現在已是深夜,街道上的行人很少。

可是當的士沿大街經過彩虹地鐵站的一個入口時,我卻目睹一個景象,令我不得不大叫起來。