尋日去炒散搬貨,我執咗隻黑貓返屋企


5. 變身

日期:2017-03-09

「係你啦!」我忍唔住興奮咁大叫出嚟。

「吓?」阿水好驚咁呆咗。

「冇嘢,我諗起聽晚買邊隻馬啫。阿水,趁未開工,不如陪我去後樓梯食飛煙。」

「Sorry,滿哥,我唔食煙架!」

「唏!唔好咁掃興,當陪我去啦!」我一手搭住佢膊頭想夾佢去後樓梯,等露娜可以喚醒佢嘅記憶。

「咦?」佢敏捷咁甩開我,然後好疑惑咁問:「你手指嘅指形、顏色,同埋你牙齒嘅色,加上你身上冇煙味,你真係唔似食煙喎?」

「哈!乜有樣睇嘅咩?」我不禁暗暗佩服佢嘅分析力。

阿水都未開口答我,阿强就大聲叫我哋:「阿滿、阿水,開工!」

「我擺低本書去leisure room先。」阿水講完就快步拎住本書行咗去。

「咩……咩……哩sir窿?」我大叫問佢,但佢冇應我,我諗我頭先已經嚇親佢。

「啪」!阿强又大力拍落我個背囊度:「成碌杉咁做乜?快啲擺低個袋去員工休息室然後開工啦!」

「哦,原來係員工休息室。」我喃喃自語。

我即刻快步跑入休息室,見到阿水一個人喺入面,今次真係「機會嚟啦,阿滿!」

我輕輕閂埋咗休息室度門再反鎖,阿水即刻驚起上嚟話:「做咩事?」

「阿水,你唔好驚,我冇惡意,我只係想畀你睇啲嘢。」

「喂,你唔好埋嚟!」佢向後退咗步。

「唔係呀!我有隻貓……」我拉開個背囊,露娜頭先雖然又被阿强打完,但竟然都冇事重好快跳咗出嚟。

「阿水!以下落嚟你唔好驚……」我想安撫下阿水先,點知露娜突然好驚訝咁嘅語氣「喵」咗一聲。

同一時間,眼前嘅阿水突然變得好唔似阿水,因為佢突然好奸好陰險咁大笑:「露娜,好耐冇見啦!」

「你唔係水星戰士,你係……」露娜緊張咁應佢,而眼前嘅阿水忽然四肢唔正常咁扭曲,塊臉嘅皮膚一層層咁跌落嚟,眼前出現咗一隻好似女喪屍咁嘅物體。

「玉娥獸!」露娜大叫。

「終於認到我啦咩?我幾辛苦由今朝喺後巷跟到而家,終於借你嘅力量揾到水星戰士,而家我先收拾月光公主,轉頭就到嗰隻水星書蟲!」

「嘿!真係估唔到,你會跟住我哋嚟地球,咁即係話……你深愛嘅長毛都嚟咗?」露娜問。

「呵呵,呢啲事唔到你管!不過,公主啊,你今世真係好樣衰!」隻玉娥獸昂起頭狂笑。

「公主殿下,快啲變身對付佢啦!」露娜喺我後面細聲叫。

「吓?又要剃腳毛同做體操?」

「第二次唔使架啦,快啲向上伸直隻手嗌變身啦,唔係你會死!」

「好好好……」我即刻伸手大叫:「變身!」

然後……然後我又不受控制咁剃腳毛同埋做體操……

「屌啊!隻衰貓呃鳩我!」我一路變身一路發出憤怒嘅叫聲。