尋日去炒散搬貨,我執咗隻黑貓返屋企


4. 阿水

日期:2017-03-08

「今次掂啦!係阿水呀,我哋今晚去見阿水!」我開心到抛咗露娜上半空。

「喵!咪抛到我咁高! 」露娜跌落嚟嗰時攬住咗我塊臉,搞到我同佢都跌咗落地。

「嗚呀!你唔係有九條命嘅咩?」我掃開佢爬返起身。

「你估貓真係有九條命嘅咩?而且我……我畏……」

「畏高?」我大聲笑咗出嚟:「做貓做到你畏高,真係冇撚用!」

「你……」露娜竟然眼泛淚光。

我呆一呆,之後只好轉個話題:「咁我哋係唔係可以返屋企抖下?」

「哼!好啦,見你揾咗幾個鐘,而且你都要返去諗下今晚點帶我去見阿水。」

「Let's go home! 」我抱起露娜離開後巷,呢個時候,我完全唔知道喺陰暗嘅後巷,竟然有對眼望住我哋。

返到屋企沖咗個靚涼,刮乾淨啲鬚,我塞咗露娜入個背囊,就出門口去酒樓。

一去到已見到阿强,佢一枝箭標過嚟:「哇!幾驚你甩底!」

「唓!我係啲咁嘅人嚟嘅咩?我早咗成半個鐘到呀!」

「屌你,叫你嚟做侍應,孭咁大個背囊做乜?」佢邊講邊大力「轟轟轟」打落我個袋度,露娜粒聲唔出,連「救命」都冇句,唔知係唔係被阿强打死咗。

「妖,你咁大力打,我收埋啲好嘢都畀你打爛啦!」我甩開咗阿强隻手,同時周圍望:「阿水呢?」

「嗰邊坐喺度睇緊書嗰個咪係囉!我話你知,我咁大個仔識親都係你呢啲老粗,好難得識到好似阿水咁有書卷氣嘅人。」阿强帶住我行到去一個接近30 歲嘅男人面前,我瞄咗佢本書一眼,全部都係雞腸。

「喂!阿水,呢個係我老友阿滿。」阿强拍一拍阿水,然後又話:「喂,你哋傾住先,我去問下老世啲嘢點搞。」

「滿哥,你好呀!」阿水企起身好有禮貌咁同我打招呼,睇佢相貌堂堂,話佢教書都有人信。

「喵。」我背後突然傳嚟一下貓叫聲,原來隻衰貓未死。

「咦?好似有貓叫聲咁?」阿水一臉疑惑。

「唔……唔係,我手機有訊息啫,哈哈哈哈!」我一路乾笑一路喺褲袋拎部手機出嚟扮睇,但好死唔死,手機突然響起嚟:「你你你快跪下,看我引弓千里箭……」

我一世都唔會忘記阿水聽到首鈴聲後,臉上震驚嘅表情。

我望一望來電顯示似乎係推銷電話,立即收咗佢線。

「啊呵呵呵呵,係呢阿水呀,你讀咁多書做咩同我哋啲老粗一齊做嘢?」我一邊轉移話題,一邊伸手去後面拉開少少背囊條拉鍊,等露娜可以望見阿水。

「我本身讀緊博士嘅,不過都想體驗下生活。」阿水一本正經咁答。

「係……」望住阿水,我知道呢個世界係幾咁唔公平,與此同時,我後面有一把聲靜雞雞咁話:「係佢啦!水星戰士!」