雞蛋與高牆


15. 化療

日期:2016-09-15

醫生說:「今日會開始第一次化療,副作用有噁心、甩頭髮……」他指著放在我面前的文件,講解我所將會接受的療程;可是,我都沒有仔細聽下去,反正,我有得選擇嗎?

我又想起黃律師,以她的說法,我所面對的不是一間普通的工廠,而是一個在鬼國位高權重的人物,我可以選擇嗎?

我突然想退縮,即將要接受化療的我,真的再有精力去面對這一切嗎?

醫生說話的聲音在我耳邊響起,我不知道他在說甚麼;我看著他,他的臉容慢慢變成父親的臉容,他的聲音變成了父親的聲音:「阿達,你求求其其、是是但但咗咁多年,所以而家積埋一齊辛苦囉!但有啲嘢,需要做就要去做架!」

「嗯。」我點了點頭。

「陳生?」

「吓?」我抬起頭一看,父親的臉變回了醫生的臉。

「如果你對個治療冇疑問,咁晏啲護士會安排你開始食化療藥物。」父親的聲音又變回了醫生的聲音。

「哦。」我簡短地回答。

當我回到病房時,看到蘇如花並不在護士站,我百無聊賴地打開手機,把「阿珠」改成了「蘇如花」。

「輸入中……」蘇如花的WhatsApp頂端這樣顯示著。

她正在打訊息給我嗎?

「見完醫生未?我收咗工啦!」她傳來了這個訊息,後面更加了個微笑表情符號。

「係,今日開始化療。」

「加油!」

「喂,我之前真係以為你係阿珠,多謝你陪我傾偈。」

「咁啱我個電話號碼就係你前女友嘅,我哋都幾有緣呀!」

「係呀,又會咁啱。」

「你重掛住阿珠?」

我看著這個問題,思考了好一會才答:「唔係……」

「咁你又過咗幾年都無啦啦揾佢?」

「一個人冇人冇物,又病咗,自然會做傻事架啦!」

「見咁有緣,你有嘢可以同我分享,睇下我幫唔幫到你!」

「如花姑娘真係有內在美!」

「哈哈!我返到屋企,要瞓啦,聽日見。」