尋日去炒散搬貨,我執咗隻黑貓返屋企


2. 任務

日期:2017-03-06

「喵!喵!」自從我執咗露娜返屋企之後,朝朝都畀佢叫春咁嘈醒,我冇諗過守護地球係咁辛苦,而且冇人工。

「咪叫春嘈住晒!」我喺床度大叫,同時揾張被遮住一邊耳仔。

「啪!」隻衰貓竟然跳上床打咗我一巴,然後佢開口話:「我唔係叫春,我係叫你起身!」

「今日我冇工開,你畀我抖下得唔得?」我好唔耐煩。

「你冇工開,但係有任務要做。」

「任務?你估打機咩?」我將成個頭塞埋入被竇。

「唉!」佢突然嘆咗口氣:「公主殿下,你嘅人生注定唔平凡,呢個係你靈魂轉生到地球嘅使命。」

「包青天呀!我想做個平凡嘅麻甩佬呀,你走啦!我唔想搞大件事!」

「第一,我唔係包青天,我係露娜;第二,如果唔靠你嘅力量去救世界,地球好快就會被毁滅,到時你又點平凡生活?」

「拯救地球揾奥巴馬,揾美國佬啦,揾我做乜呀?」

「公主殿下!」露娜跳上我個頭一嘢抓開咗張被:「你睇下你?你連奥巴馬唔再係美國總統都唔知,而家個總統叫特朗普呀!」

「OK!咁你揾特朗普啦!」

「坦白講,連美國嘅軍力都唔足以拯救地球,可以救地球嘅就只有水手服戰士。」

「咁你畀咗件水手衫阿特朗普著啦!」我又拉返張被上嚟。

「公主殿下,你點可以咁講!我哋只有一位月光公主!」

「你都識講啦,我得一個人,點救到地球?」

「所以,你而家嘅任務,就係揾埋其他四位戰士!」

「重有其他四個?」

「係!」佢哋係同你同一時間轉生嚟地球嘅。

「咁……」我畀佢煩到瞓唔返坐咗起身。

「可能下一個戰士今世係有錢人,如果佢知道你嘅公主身份,作為你嘅部下,佢一定會好好照顧你,到時你分分鐘唔使打工啦!」露娜似乎睇穿咗我諗乜。

「好!揾咪揾!去邊揾?」

「唔知架!出街行下啦!」

「吓?咁咪即係鳩揾?」

露娜睥住我,我望住佢個臭串嘅樣,唔知點解確係好有親切感。

「OK!我換返條長褲就出發。」

「換咩吖,今日天氣好熱呀,重著長褲?」

「重好講?自從識咗你嗰晚變身時剃鬼晒啲腳毛起,我日日出街都著長褲,我真係接受唔到自己冇腳毛囉!」

「公主殿下,如果著水手服時露出成腳腳毛,成件事重噁心!」

我認真幻想咗一下就成個人打咗個冷震,好無奈咁回應:「嗯……」