【屎眼故】雞蛋與高牆


14. 巧合

日期:2016-09-14

我躺下來看著天花板,心裡又想起阿珠,於是便拉上床位的掛簾,拿起電話致電給她。

「喂。」她的聲音帶著鼻音。

「阿珠,你病咗?把聲咁嘅?」我問。

「冇呀……係呢!上次唔好意思,突然有啲事收咗你線。」她這樣說,反倒是我有點不好意思,畢竟是我先打擾她的生活的。

而這時我才想到,我致電給她是要說甚麼的呢?就在我還未開聲時,阿珠又說:「你個病而家點呀?」

「嗯,證實咗係cancer。」

「係咩cancer?」

我猶豫了一下才道:「係肛門癌。」

「肛門……癌?」她的語調十分驚奇。

「係,哈哈,我都估唔到世界上真係有屎眼癌!」我故作輕鬆地道。

「你喺邊間醫院?」

「你唔使嚟睇我架啦,我唔係想打擾你,我……」我還未說完,我旁的掛簾被慢慢拉開,蘇如花拿著電話站在我面前。

「你……你打去91234567呢個電話?」蘇如花一字一句地問。

她突如其來的問題令我目瞪口呆,我望望她和她手上的手機,然後我拿起自己的手機放在耳邊,說:「喂?」

蘇如花看著我,又拿起她的手機放到耳邊說:「喂?」

她的聲音從我的手機中傳了過來!

「你!」我和她不約而同指著對方叫了起來!

「你做咩打畀我呀?你點知我個電話架?」蘇如花面帶怒色把電話掛了線後,放進護士服的口袋中。

「我問你做乜拎咗阿珠個電話就真呀!」我著急地說。

「我都唔識邊個阿珠!」

「阿珠咪我前女友囉!不……不過甩咗拖幾年之嘛!」

「幾年?」她稍大聲地叫了一下,然後又壓低聲線:「你知唔知人係會轉電話架?」

「你……你個電話號碼新開嘅咩?」

「冇錯!」

「咁……咁你又扮阿珠?」

「我開頭話你打錯,你又唔信!咁你講到自己喺醫院咁慘,我咪陪你傾下囉!」她噘著嘴道。

「咳咳!」一把女人聲從蘇如花身後傳來。

「護……護士長!」蘇如花伸了伸舌頭轉過身去說道。

「呢位病人要去見醫生。」那護士長冷淡地說,同時瞪了蘇如花一眼。

「知道。」蘇如花回應著。