【都市故】彩虹站多出來的路軌


7. 尋找

日期:2016-09-07

我回頭一看,路邊泊了一輛的士,而那正站在車子旁的司機正是四個多月前那夜,在彩虹接載過我的司機。

「你印堂發黑喎,哥仔!」他說。

「乜又係你!上次喺度話我撞鬼,根本我乜事都冇!」我皺起眉頭道。

「無啦啦激嬲個靚女,重唔係行衰運?」

這時我回頭一看,已沒法在街上找到Coco的身影。

「望咩吖望?拎個手機出嚟啦!我灑咗櫻花呀!」他說著搖了搖手機,原來他把車泊在路邊,竟是為了玩Pokemon GO…..

我立即把手機拿出來看,果然,地圖上多了不少小精靈,可是,我現在哪有心情玩下去?

「捉咗先啦!今晚我唔想do,一陣捉完兜你周圍揾阿靚女啦!」他似是看穿我的想法。

「咁點係呀!」我伸手摸摸腦門,然後開始抛擲精靈球去捕捉那幾乎源源不絕的小精靈。

「呼!咁快過咗半個鐘,冇咗櫻花啦!」半小時後,的士司機垂下手機道。

我古惑地笑了笑:「有呀!我啱啱灑咗!」如是者,我們又埋頭埋腦地又捉了不少小精靈。

又再半小時後,「又咁快過咗半粒鐘啦!」我說。

「正!今日收穫唔少,不過真係係時候車你周圍兜下揾返靚女啦!」他說。

「唔收我錢?」我承認我的性格有點龜毛。

「唔使啦!上車!」他豪邁地說。

我坐上了前座司機旁的位置,看著司機的名牌道:「啊!時叔,咁麻煩你啦!」

「冇問題啦!你點稱呼?」

「叫我象仔啦!」

「你打畀靚女,睇下佢聽唔聽你電話啦!」

事實上,我甫坐下來便已撥打給Coco,「嘟……嘟嘟……」 Coco沒有接電話。

「佢冇聽電話,喺街隨便兜下先啦!」我說。

「OK!」 時叔答。

的士在觀塘的街上周圍駛著,可是都沒能見到Coco的蹤影。

如果Coco有用WhatsApp,至少我還可發個訊息請她原諒,看看她是不是已讀訊息,但她連WhatsApp也沒用,我只好發了一個SMS給她:「唔好嬲啦!我下次唔敢,你喺邊?我嚟揾你啦!」

可是,那邊並沒有回應。